趙哲妤帶6歲囡囡遊大馬 初嚐親子義工體驗 藝人相片, 趙哲妤

starphoto

趙哲妤帶6歲囡囡遊大馬 初嚐親子義工體驗


     暑假期間，不少港人都一家大細去旅行避暑。而趙哲妤（Uny)早前亦襯住假期帶咗喺馬來西亞出生，今年6歲大嘅囡囡（小魚）同埋媽咪去馬來西亞吉隆坡親子遊，玩得不亦樂乎。原來受疫情影響，Uny一家巳經超過3年無離開過香港，雖然喺小魚2-3歲嘅時侯，因為要陪媽媽出國工作或旅遊而坐過幾次飛機，但因為年紀太細，小魚巳經無咩記憶。今次坐飛機，小魚全程又乖又合作，仲被高空上的雲彩吸引，發揮無限嘅想像力，覺得有唔同嘅動物化身為雲彩，陪佢坐飛機咁話。

     而喺馬來西亞，Uny 安排咗好多有心思嘅親子活動，包括手工Batik彩繪、白鑞工藝品制作、仲特別帶埋小魚去探訪當地兒童收容中心，等佢可以從細就培養參與慈善嘅習慣。Uny話：「一直知道東南亞有不少孤兒院，而感到恩惠嘅係，見到好多有心人，會主動捐贈物資及金錢去幫助這些小朋友。」而Uny今次都同當地朋友一齊買咗好多禮物同日用品送俾住喺收容中心嘅小朋友。佢仲借機會呼籲大家：「除咗有錢出錢之外，希望大家做善事時，有力出力，例如有教學經驗嘅朋友可以幫手同小朋友上吓堂，識烹飪嘅人可教下小朋友煮嘢食，甚至運動員都可教下小朋友運動，皆因授人以魚，不如授人以漁。」佢話，見到有小朋友無機會去學校讀書，雖然收到善心人送嘅作業，但係又唔識做。所以身為言語治療師嘅佢，都希望自己下次做義工時，除咗贈送物資，可以有機會拉多幾位朋友去做義教，等小朋友有機會學多啲知識。完成探訪後，Uny特別大讚囡囡小魚有耐性，皆因平日在家小魚會比較依賴家人，但做義工嘅時候竟然好懂事，會幫忙照顧年紀更細嘅弟弟妹妹，也願意分享同施贈，感恩今次旅程真係獲益良多。

     而話明去旅行就當然有美食，Uny就在當地朋友的帶領下，食勻米芝連傳統馬來餐、SS2貓山皇榴連、肉骨茶、芽菜雞、咖央多士、拉茶等等馬來西亞傳統美食。Uny笑道：「去馬來西亞唔食榴連就會像欠缺了什麼一樣，而小魚這次旅程初嚐榴蓮，仲未識欣賞，不過大人就真係食得好滿足咁話。」