免費論壇 繁體 | 簡體
Sclub交友聊天~加入聊天室當版主
分享
返回列表 回復 發帖

黎瑞恩接受新城《QK玉瑛室》訪問

黎瑞恩接受新城《QK玉瑛室》訪問
小恩子為善最樂:做藝人要有社會責任
唔一定出錢 出力都得


(2024年7月9日 – 香港)藝人黎瑞恩(小恩子)上周五(5日)到新城廣播接受《QK玉瑛室》主持譚玉瑛(阿譚)、何基佑和黃筠兒訪問,新城廣播首席營運總監馬浚偉先生專程到直播室探班,他甫見小恩子即稱呼她「朱小姐」,小恩子開心稱呼馬浚偉「CEO」,皆因二人曾合作《男人40 CEO》舞台劇,馬浚偉飾演CEO,小恩子則飾演朱秘書,兩人開心聚舊。

小恩子和譚玉瑛是藝人高爾夫球協會的成員,兩人經常相約打高爾夫球,小恩子表示:「估唔到阿譚你會打波,仲好勤力,係乖學生。」譚玉瑛即笑言:「我係初哥,同小恩子喺藝人高爾夫球協會一齊打波,有好多藝人參加,好有親切感,最開心係打完波一齊食飯。」

藝人高爾夫球協會是一個非牟利慈善機構,經常會舉行籌款幫助低收入家庭、獎勵讀書成績優異的小朋友及派糉等慈善活動,小恩子坦言:「做藝人要有社會責任,要為社會作出貢獻,所以有能力就去做,唔一定出錢,出力都得,其實我細個係讀基督教學校,本來信主,但最近都聽多咗佛偈,乜都聽吓,最緊要心正。」

譚玉瑛透露多年前與男友在某餐廳巧遇小恩子,對方竟然送她一支紅酒,「侍應攞住支紅酒過嚟,話『係黎小姐請你飲』,我就舉起隻杯多謝你,我心諗,你咁得意嘅,同你唔熟,但你又咁好,畀多支酒我飲。」小恩子笑言:「一睇就知你係酒仙啦!」小恩子又指這些情況經常都會發生,皆因她希望看到身邊人開心,只是有時都會撞板,「對人好人哋未必鍾意,人哋會心諗做咩啫?你想點?我都唔會理,會照做,可能我熱情得滯,應該學習吓唔好咁熱情,但都好難。」

小恩子性格十分開朗,經常都笑臉迎人,她直言很多病痛都是鬱出來,「成日多鬱結、唔開心嘅人,身體就會有好多病走出嚟,身體麻麻嘅人,應該去曬吓太陽,開心就係良藥。」小恩子又分享自己多年前胰臟生了兩個瘤的經歷,當時她選擇「唔理佢、話之佢」,最後兩個瘤竟然神奇消失了,「每個人都會行去最終目的地,所以我乜都冇做,醫生又冇睇,就咁過咗8年,有日肚痛,心諗應該都差唔多拜拜,點知醫生話係腸胃炎,我話仲有兩個瘤不如照埋,但醫生話見唔到有瘤,只係有兩撻疤,當時我可以合格去買份保險,就知自己已經完全冇事,呢份係我50歲時最大份嘅生日禮物,可以繼續我嘅開心人生。」問小恩子是否已沒有事情令她煩惱?她直言:「冇,我連死都唔驚咯!」


詳細節目內容,請重溫7月5日,下午3-4時,新城知訊台《原來生活好快樂》「自主人生」環節,網址:https://www.metroradio.com.hk/MetroInfo/

1. 馬浚偉、黎瑞恩.JPG (213.46 KB)

1. 馬浚偉、黎瑞恩.JPG

2. 黎瑞恩、譚玉瑛、何基佑、黃筠兒.JPG (192.21 KB)

2. 黎瑞恩、譚玉瑛、何基佑、黃筠兒.JPG

3. 黎瑞恩、譚玉瑛.JPG (170.02 KB)

3. 黎瑞恩、譚玉瑛.JPG

4. 黎瑞恩(1).JPG (336.51 KB)

4. 黎瑞恩(1).JPG

5. 黎瑞恩(2).JPG (229.24 KB)

5. 黎瑞恩(2).JPG


Star.Starphoto聯絡資料
電郵: star.starphoto@gmail.com
Line ID: star.starphoto
返回列表