阮兆祥2013一祥朋友演唱會發佈會
阮兆祥已經入行正正第三十年，眾所周知祥仔拍戲得，搞笑得，其實佢唱歌都好得，得左！雖然佢嘅搞笑形象深入民心，不過其實祥仔由入行至今從來無忘記過音樂！今次佢決定暫時拋開福祿壽身份，以歌手名銜孭飛，係今年12月14及15日於新伊館開辦首個個人演唱會﹣「阮兆祥2013一祥朋友演唱會」！勢要話俾你知阮兆祥其實仲係一個歌手！
演唱會即將開鑼，大會遂於昨日（11月1日）下午六點正於西九龍中心一樓大堂舉行演唱會發佈會，更請到Donald 唐劍康擔任發佈會ＭＣ。發佈會未開始已經有成班FANS圍觀，場面墟冚。連商台行政總裁陳志雲先生同TVB製作資源部總監樂易玲小姐都親身到場支持祥仔，二人今次因為祥仔而首度一齊出席公開場合，可見祥仔份量十足。另外祥仔媽媽亦都身體力行到場撐愛子。
開首個個唱，向來人緣甚好嘅祥仔，有一班好朋友靜雞雞為佢專程錄製的打氣片段，片段中粒粒都係電視界、樂壇、影壇首屈一指嘅巨星，包括有cool魔張智霖､靚靚､伍詠薇､草猛､周汶錡、洪天明、麥包、周家蔚、梁靖琪、歐陽靖、陳敏之、湯盈盈、鍾麗淇、湯寶如、歐陽德勛、蔡立、張美妮、安德尊、姚嘉妮、楊思琦、盧覓雪、思捷、吳啟華、苗僑偉關寶慧、杜德偉、鐘鎮濤、黎耀祥、志偉等等，連嘉玲､梁家輝、學友同梁朝偉都有份為祥仔打氣！！好多片段仲要係越洋拍攝，認真有心，難怪祥仔驚喜之餘，睇完都眼濕濕啦！
今次演唱會老友王祖藍特別為祥仔創作咗一首演唱會嘅主題曲《世界仔》! 他覺得祥仔如「世界仔」一樣，藉此鼓勵港人在逆境仍可搵到自己的道路及生存之道。現場更首播了祥仔早前拍攝演唱會「世界仔」ＭＶ，俾大家先睹為快！只見ＭＶ內祥仔又跳舞又瞓街就知佢幾認真！
此外認識祥仔多年的老友黎芷珊親身出現撐場，並且上演「最佳男主角」即場深情對話。祥仔表示一直都好想上芷珊節目皆因上得佢節目嘅個個都係天王巨星，今次仲要係現場版相信祥仔係芷珊心目中份量不少！芷珊更即場頒發咗本年度最LIKE演唱會獎座予祥仔添！最後二人更首度公開合唱「從不喜歡孤單一個」一展二人唱功，簡直聽出耳油！
由於演唱會一飛難求，未公開發售首兩場演唱會門票已經爆滿，唔好話一飛難求，連祥仔求大會都求唔到一張飛！不過主辦機構同D Sponsor都好鍚祥仔，特地留左一張飛咁大把俾祥仔，等佢可以留俾佢最心愛的人！並且宣佈「阮兆祥2013一祥朋友演唱會」門票於11月4日正式公開發售。而由於未公開發演唱會門票已經爆滿，所以大會更同時宣佈加開場12月15日夜場！真係恭喜哂！最後祥仔仲請埋所有嚟臨撐場嘅老友上台同大家祝酒！慶祝演唱會頭兩場爆滿之外預祝加場都一樣爆滿，演唱會順順利利！ |
新浪微博
QQ空间
人人网
腾讯微博
Facebook
Google+
Plurk
Twitter
Line
